Lapolis Nasyonal Ayiti lanse yon "seri operasyon san kanpe" toupatou nan peyi a nan lide pou kraze fwaye gang yo: se konsa pòt pawòl adjwen lapolis la ouvè ayè lendi a, konferans sou bilan entèvansyon fòs lòd yo nan peyi a.
Nan yon konferans pou laprès, Lionel Lazarre enfòme plizyè inite espesyalize nan PNH la ap batay nan plizyè katye tankou Solino, Nazon, Pòsmachan, Channmas... pou dechouke bandi yo.
Fòs lòd yo rive netralize plizyè manb gang ki te atake katye Pòsmachan. Kendy, Alyas Jeff Mafia, se youn nan chèf gang enfliyan ki tonbe nan boukantay kout zam ak lapolis.
Libere katye yo anba kontwòl bandi, se pa yon bagay fasil. Nan Nazon, zòn kafou Samida pa egzanp, gwoup nèg ak zam mete anpil pyèj sou wout la pou anpeche lapolis antre nan katye a.
Sepandan, selon Lionel Lazarre, PNH rive dejwe plan mesye yo antre nòmalman nan zòn nan.
Yon lòt bò, pòt pawòl lapolis la relate plizyè operasyon nan Dèlma, nan Tabarre, nan Kwadèboukè, toujou nan lide pou kwape aktivite gang yo nan peyi a
N ap fè sonje, selon yon rapò Nasyonzini, gang yo kontwole plis pase 80% nan kapital la, Pòtoprens.
Toujou selon Nasyonzini, vag vyolans yo an Ayiti pote ale plis pase 5000 moun pou ane 2024 la e fòse plis pase 700 mil lòt kouri kite lakay yo
Enregistrer un commentaire